Laura Esteve Donostian jaio zen 1939an. Zumeta, Sanz, Balerdi, Ameztoy eta beste batzuk bezala, Artista Berrien Lehiaketei esker Gipuzkoako abangoardia artistikoan murgildu ziren artisten belaunaldikoa da.

Nahiz eta pintura inoiz ez utzi, Laurak publizitate-diseinuari eutsi zion eta bide horretan barneratuz jorratu zuen bere etorkizun profesionala.

““Jarduera desberdinak dira. Pintatzea behar bat da. Jarduera askeagoa denez, une bakoitzeko barne bulkadari men eginez burutzen da. Grafismoa ere interesgarria da niretzat, hark ere badu bere teknika, eta lanbidearen ikuspegitik etorkizun gehiagokoa da”.

Laura Estevek beti bilatu du trebetasun teknikoa bai pinturan bai diseinuan, baina arte-lana lortzeko grina inoiz galdu gabe.

Cobreros Uranga irakasle zuela hasi zen bere burua prestatzen Arte eta Lanbide Eskolan. Geroago Ascensio Martiarenarekin ibili zen, hark Marrutxipin zuen estudioan, eta baita Gipuzkoako Arte Eskolan ere.

Ia hasieratik bertatik publizitate diseinurako interesa agertu zitzaion eta afixak egiten hasi zen Ascensio Martiarenaren laguntzarekin. Beste aldetik, Rafael Munoak utzitako liburuen bidez, erreprodukzioen bidez, Parisera eta Londresera bidaiatuz, lehen urratsak egiteko behar zituen kontzeptuak eta teknika eskuratu zituen.

Beti eraman du bere barnean pintura eta marrazkigintzarako grina. Marrazteko esku trebetasun hori urtetako lanari esker lortu du. Izan ere, ikasteko gogo nekaezin bat izan du beti (1986an marrazki eta grabaketako ikastaro bat egin zuen Peruggiako Arte Ederren Eskolan) eta, gainera, edozein toki eta euskarritan (eskuzapitan, orri bazterretan...) marrazkiak nahiz zirriborroak egiteko berezko joera erakutsi du.

2002ko urtean, pertsona ezagunen erretratu azkarrak egin ditu, haiek telebistako Localia programan elkarrizketatzen zituzten bitartean.

Lauraren lehen lanak irudi eta barnealde gouache eta ureztatuak ziren, bidaietan ikusitako paisaien zirriborroak, forma estilizatuen konposizioak, eta orain, 2000ko urteaz geroztik, olio-pinturako lan bat egiten ari da abstrakzio lirikoaren hizkuntza erabiliz, irudipenak, ehundurak eta kalitateak agertzen eta desagertzen diren pastel kolorez argitutako paleta baten bidez.

Bost urtetan ALAS Norte publizitate agentzian egin zuen lan. Ilustratzaile gisa hasi zen, baina berehala aurkitu eta ikasi zuen zer den diseinua, zer maketatzea, tipografiak duen garrantzia eta nola erabili, eta irudi grafikoak erabiliz diseinua nola aberastu.

1978an bere estudioa sortu zuen (Estudio TC de Comunicación), Agustin Echenique eta Maite Menchacarekin batera. Publizitate lanak egin zituzten, merkataritza publizitateko kanpainak eta baita kultur eta gizarte ikuspuntuko nahiko lan ere instituzioentzat (Donostiako Udala, Gipuzkoako Foru Aldundia, Atzegi eta Aspace kanpaina).

““Inoiz ez nintzen moldatu publizitatearen aginduetara. Nik egindakoa ez zen behar bezainbat komertzial izaten; izan ere, nire baitan neraman jasotako prestakuntza artistikoa eta alderdi batzuk arbuiatu egiten nituen halabeharrez”.

Hori dela eta, bere kontura jarri eta kultur nahiz gizarte proiektutan parte hartzen hasi zen, bere nortasunari hobeto txertatzen zitzaion lan modua hartu zuelarik.

Hala eta guztiz ere, ez zion diseinu komertziala egiteari behin betiko utzi. Hala, bere bezeroen artean ditugu Couth makina-erreminta, Tavex ehun-taldea (1990), Sanfor larrugintza (1990), Stua altzariak (1991), Casa Julian (1993) eta Arzak jatetxea. Azken horrekin 25 urte darama lanean logotipoa diseinatzen eta menu nahiz plateretan aplikatzen.

Lauraren nortasuna ertz askotakoa da eta hori garbi ageri da bai haren pintura eta diseinu lanetan eta baita parte hartu duen proiektu guztietan ere.